|
Miércoles, 03 de Febreru de 2010 09:17 |
|
 Los vertíos de sustancies fecales tán repitiéndose de contino.
Unidá Nacionalista Asturiana quier amosar el so esmolecimientu polos vertíos que se tán produciendo na playa del Puertu de Santa Marina del Mar de contino.
La playa del Puertu de Santa Marina del Mar, nel conceyu de Castrillón, lleva tres de sí una riestra de vertíos ensin que pel momentu tea solucionáu'l problema. Tanto si salen a la playa directamente como si lo faen al traviés del ríu Ferreira, ye evidente que tán produciéndose fedores na zona que son un focu d'infecciones pa cualesquier persona que camine pela playa, y de siguir asina de cara'l branu puen representar un grave problema de salú pública.
Dende Unidá Nacionalista Asturiana considérase que les esplicaciones del Ayuntamientu de Castrillón son a lo menos poco afechisques yá que nun puede creese que nesta época del añu l'agua de la lluvia pueda tener golores fediondos, y de ser asina, UNA convida al Ayuntamientu a que revise'l sistema de colectores pluviales, comprobando que nun se contamine la rede en dalgún puntu con vertíos que vengan de la rede de fecales y por supuestu al so vaciáu y saneamientu enantes de que termine la temporada de lluvies.
Unidá Nacionalista Asturiana píde-y asina mesmo a la Conseyería de Mediu Ambiente, Ordenación del Territoriu ya Infraestructures, que-y dea una solución lo primero posible a esta situación que ye a lo menos incómoda ya insaluble pa la ciudadanía de la zona. |
