La propuesta d’UNA pidía a la Xunta Xeneral un Estatutu qu’asegure la oficialidá del asturianu, una carta de derechos y una financiación afayadiza.

PSOE, PP y URAS-PAS nun sofitaron la propuesta que sí contó col votu positivu d’IU y UICA

 

El plenu municipal del conceyu de Carreño ta acabante refugar la moción de Unidá Nacionalista Asturiana (UNA) na que se pidía que'l Conceyu de Carreño tresmitiera a los 3 grupos parllamentarios la necesidá urxente de facer una reforma del estatutu d'autonomía asturianu p'afayar la realidá institucional asturiana a la de l'actual situación del estáu y dar respuesta a cuestiones inaplazables como asegurar la capacidá financiera d'Asturies y de los sos conceyos,tornar una situación de desigualdá y de falta de recursos d’Asturies y los sos conceyos, iguar una Carta de Derechos y Obligaciones y proclamar la oficialidá de la llingua asturiana.

La moción llevóse a votación nel plenu, nel que tuvo’l sofitu, amás de la propia UNA, de los conceyales d’Unión Independiente de Carreño (UICA) ya Izquierda Unida. Sicasí, la propuesta nun contó con mayoría al votar en contra de la mesma PSOE y PP y abstenese’l conceyal de PAS-URAS.

El conceyal d’UNA en Carreño, Xuan Rodríguez recordó que la propuesta d’UNA nun ye un caprichu, nin una defensa a lo xole d’un modelu xurídicu políticu que nun ye’l que más nos gusta, sinon que se plantega porque na situación actual colos problemes de financiación nos conceyos, de blindaxe d’inversiones d’otros territorios, y del peligru que cuerre’l nuesu patrimoniu cultural y especialmente la llingua, Asturies nun pue dexar pa prau la posibilidá d’iguar esos problemes a traviés d’una reforma estatutaria.

El conceyal d’UNA calificó de “esperable anque decepcionante” la postura de PSOE y PP, que siguen les consignes marcaes dende Madrid y Uviéu, y que si punxeren en marcha una reforma nun sedría pa dar respuesta a estes necesidaes sinon pa fundir más a Asturies, la so economía, los derechos de los sos ciudadanos y ciudadanes y la so cultura. Nesti casu pudo más la consigna de partíu que les propies necesidaes d’Asturies y de Carreño, como tantes otres veces tamos viendo nos plenos municipales.

Per otru llau UNA quier espresar la so indignación con PAS- URAS que se negó  a sofitar la moción demostrando una vegada la política nes antípodes del asturianismu que tien esta coalición en Carreño. Xuan Rodríguez recordó que Joaquín Rodríguez, conceyal d’URAS-PAS que ya fue conceyal en Carreño na etapa preconstitucional, siempre actúa con indiferencia o mesmamente belixerancia énte cualquier iniciativa d’UNA que pida la oficialidá del asturianu o la normalización de la llingua asturiana nel conceyu y yá nel 2007 PAS-URAS negóse a sofitar la ordenanza de normalización de la llingua. La so xustificación nesti casu de l’abstención foi que  “no estoy de acuerdo en darles más capacidad a los entes autonómicos”.

UNA quier agradecer a UICA y IU el so sofitu, que nel segundu casu tien más méritu al nun concasar cola política d’esta coalición nel conxuntu d’Asturies, na que plantega como una victoria la so incapacidá pa forzar al PSOE a proponer l'estatutu qu’Asturies precisa.