|
Llunes, 18 de Xineru de 2010 10:11 |
 Pa Yolanda González, la Conceyalía d'Urbanismu disponía d'información abondo pa evitar el derrumbe.
Yolanda González como vocera d'Unidá Nacionalista Asturiana en Xixón, tresmitió la petición de la organización a toles fuercies con representación nel Ayuntamientu de “tratar nel próximu plenu del Ayuntamientu tanto les causes del derrumbe del edificiu de la cai Los Moros, como les midíes preventivas que se tomaran”. Pa UNA la Conceyalía d'Urbanismu disponía de datos abondo pa torgar el derrumbe o siquier p'adoptar midíes tendentes a evitalu, yá que “esistía una petición de declaración de ruina, lo que tendría que llevar apareyáu un estudiu de la situación del edificiu que detectara'l riesgu de derrumbe” y inclusive fala d'intervenciones recientes sobre l'edificiu por cuenta del so estáu.
A xuiciu de la vocera “nun podemos considerar suficiente la xustificación de que taba en marcha un espediente pola mala situación de la fachada, nin tampoco cabo achacar el derrumbe única y puramente al mal tiempo” y ello porque “si l'edificiu, como paez, taba nun estáu tan llaceriosu y nel Ayuntamientu yá había antecedentes sobre'l mesmu, hubiere o non declaración de ruina, debieron dictase órdenes d'execución que siquier, obligaren a l'adopción d'unes mínimes midíes de seguridá”.
La vocera en Xixón, insistió en reclamar que “s'esplique con claridá lo que realmente asocedió, pa evitar que vuelva pasar y aselar a la ciudadanía en relación col control del estáu de los inmueble de la ciudá” concluyó Yolanda González. |
