|
Vienres, 15 de Xineru de 2010 08:23 |
 UNA-Mocedá desixe al Conceyu de Llanera que desplique por qué s'impidió que Fai! realizara la so asamblea na Casa de Cultura.
UNA-Mocedá desiximos al Conceyu de Llanera que desplique los motivos polos que se canceló l'actu de Fai! convocáu pal vienres 8 de xineru na Casa de Cultura (Posada). Dende UNA-Mocedá nos paez indispensable que los responsables políticos del Ayuntamientu dean motivos contundentes pa tener torgada la celebración de l'Asamblea Abierta convocada por Fai!, yá que de lo contrario taríemos énte un auténticu actu de censura que sedría inalmisible.
Pa UNA-Mocedá l'usu del asturianu como llingua pa presentar la instancia, que según distintos medios de comunicación podría ser el motivu de nun almitir la solicitú, amás de tar recoyida y avalada pola llexislación asturiana, sedría una mera escusa pa impidir la realización del actu, yá que ye evidente que nuna democracia los drechos fundamentales de conceyu nunca puen tar llimitaos por cuestiones formales, como bien saben los dirixentes del PP del Conceyu.
Les mocedaes nacionalistes quieren tresmitir la so solidaridá a los compañeros de Fai! por esti atropellu a los sos drechos y amosa-yos tol nuesu sofitu énte esta violación inxustificada a l'actividá de la so organización.
UNA-Mocedá
|
