La sida de la especialización nun pue valir p’allongar la protección de les muyeres afectaes por violencia machista.

Unidá Nacionalista Asturiana asume como un recule na llucha contra la violencia machista n’Asturies el Plan de Comarcalización que se recueye na Llei Orgánica de Midíes de Protección Integral contra la Violencia de Xéneru y tarrez que cola aplicación de la “especialización”, qu’en sí ye positiva y evidentemente necesaria, vaya producise un empeoramientu na protección xurídica de les muyeres maltrataes.

D’esta manera’l portavoz nacional d’UNA, Faustino Zapico treslladó la “molición pola imposibilidá de que les muyeres d’Avilés podian presentar les denuncies nesti conceyu y tengan que se treslladar a Uviéu o Xixón”. Según UNA el problema de la violencia machista ye “lo suficientemente importante como pa esixir un verdaderu esfuerzu a los poderes públicos darréu qu’hai pocos fenómenos que xeneren tantu dolor y muertes de forma tan inxustificada.”

Y amestó que pa UNA “ye fundamental qu’Avilés nun se convierta nuna ciudá de segunda frente a Uviéu y Xixón, porque tien el suficiente pesu poblacional pa garantizar la rentabilidá de los servicios públicos y ente esos servicios tien que tar una sala especializada p’atender les víctimes de la violencia de xéneru.”

UNA destaca qu’esti Plan de Comarcalización “vuelve marxinar l’oriente y occidente d’Asturies, onde les sos muyeres van tener que se desplazar a Uviéu y Xixón pa presentar les denuncies, lo qu’evidentemente va dificulta-yos enormemente la so presentación, fechu ésti que cuidamos bramente grave” afirmó Faustino Zapico.