Yolanda González, portavoz de Xixón de Unidá Nacionalista Asturiana, llamenta lo que considera un pasu más de la estratexa del cierre de la industria naval na ciudá.

UNA al traviés del so portavoz en Xixón Yolanda González, quiso dexar costancia de la indignación de la so organización “cola actuación de Pymar, cola complicidá del Principáu y Ayuntamientu, asina como colo enquivocao d’una xestión que, incumpliendo los compromisos de privatización, entregáre-yla al Grupo Vulcano qu’incumplía, como se demuestra agora, los requisitos básicos pa garantizar un futuru al astilleru”.

Yolanda González llega a esta conclusión viendo l’informe que los alministradores concursales de Juliana trasladaren el xuez asina como poles denuncies de los trabayadores de Juliana que ya sólo esperen la prexubilación como salida a la situación del últimu astilleru de Xixón.

La portavoz recalcó que "la gran mentira sobre la viabilidá de los astilleros entamárela el propiu Presidente Zapatero con aquelles rimbombantes pallabres de que nun s’abandonaría a la so suerte a nengún trabayador, cuandu lo únicu ciertu ye que l’oxetivu yera el cierre de l’industria naval xixonesa, como llevamos denunciando dende fai meses”.

Amás UNA tamién destacó “la molesta coincidencia cola campaña istitucional a favor de la Regasificadora de Xixón, qu’una vegá finalizada la fase de costrucción va dexar notablemente menos empléu que’l que se tá destruyendo nel sector naval” lo que pa Unidá Nacionalista Asturiana ye “una estratexia más del PSOE e IU pa tapar la política de desmantelamientu de la industria xixonesa y convertinos en productores d’una enerxía que nun necesitamos y que nun pretende sinon, el desendolcu d’otres fasteres del estáu que nun quieren asumir la degradación que supón la producción enerxética”.

Pa UNA toes les declaraciones que se realizaron pa llograr el cierre de Naval Xixón como forma de garantizar la viabilidá de Juliana “nun foron más qu’una sarta de mentires” ensin que naide se responsabilice de na “ya que ye la marca de gobiernu de PSOE e IU, la irresponsabilidá absoluta na so xestión”.

Yolanda González quiso dexar la siguiente entruga nel aire “¿Por qué se cierra un sector en auge en tou el mundu como el naval y a cambiu instálase una industria peligrosa cerca d’un núcleu urbanu mui pobláu pa producción enerxética, industria que les fasteres más desendolcaes del estáu español se nieguen a establecer nos sos territorios?” pa UNA la rempuesta ye cenciella “los políticos asturianos saben que los sos puestos dependen de defender intereses que tienen que ver más colos intereses de Madrid que colos propios.”